نظرة من عين كفيف .... ثرثرة مجنون

خللو العيال تتعلم بقى

2007-05-29T20:59:00.000+03:00

خللوا العيال تتعلم

أهم حاجة فى الدنيا القدرة على إيجاد حلول مبتكرة للمشاكل.. عشان كل يوم بتصادفنا مشاكل جديدة عايزة حلول عبقرية فيها شوية إبداع وابتكار.. مبدئياً الإبداع والابتكار تعريفهم: القدرة على إيجاد حلول بديلة غير معتادة.. والتفكير بطرق غير تقليدية.. التعبير عن الأفكار بشكل جديد وغير مسبوق.. الطفل بيتولد مبدع.. بس إحنا بنعلمه يقتل جواه الابتكار.. فمثلاً الطفل وهوه عنده 3 سنين لو عايز حاجة من برطمان.. هيقلب البرطمان عشان يطلع اللى جواه مش هيجيب معلقة ويسحل نفسه.. دلوقتى عايزين نزود الإبداع والابتكار فى الأطفال؟؟ بجد حاجة مهمة جداً.. يلا نشوف بره بيقولوا إيه عشان تشجع أطفالك يكونوا أكثر إبداعاً:

- شجعهم على حل مشاكل بسيطة.. زى إنهم يضعوا شيء جوه شيء يدوبك على مقاسه..
- خبى منهم اللعب بتاعتهم وخليهم يدوروا عليها ولو لاقيوها كافئهم..

- ساعدهم فى إعادة خلق أشياء جديدة من أشياء انتهى عمرها الافتراضى.. زى مثلاً لعبة قديمة أو هدوم قديمة..

- هات لهم ألوان وورق وخليهم يرسموا.. الرسم من أكتر الحاجات اللى بتزود الابتكار عند الأطفال..
- حاول تخليهم يفكروا فى استخدامات أخرى لحاجات بيستخدموها فى العادى..

- أقرأ لهم قصص وأشعار بتستخدم صور وتراكيب بسيطة بس مبتكرة وإبداعية..

- حاول تساعدهم يكون عندهم فضول وحب استطلاع

أطفالنا ليهم حق علينا... يلا نساعدهم يبقوا أحسن.. وخلى العيال تنبسط..

حكمة تعلمتها فى الجيش

2007-05-26T19:42:00.001+03:00

لو ميّل عليك الزمان... ميّل وخد فيها

وإن سألوك الناس.. قول مؤخرتى وأنا حر فيها

وعجبى

ارتباط الجمال بالفن

2007-05-26T19:06:00.000+03:00

الجمال والفن مرتبطان ارتباطاً وثيقاً بفكرة الحرية ومفهومها، كما ترتبط هذه المعاني المجردة غالباً بالمتعة العقلية والروحية علي السواء. إن الاتفاق علي تعريف صريح وقاطع لمفهومي الجمال والفن -مما لا يدع مجالاً للجدل بين ما هو جميل وما هو عكس ذلك- يعد من المستحيلات. ذلك أن مفهومي الجمال والفن من المفاهيم المجردة التي لا يمكن التعبير عنها أو تصويرها في شكل محسوس في عالمنا المادي. وعلي الرغم من نشأة وتطور علم يدرس الجمال بشكل خاص ألا وهو علم الجمال Aesthetics إلا أنه لم يتفق علي تعريف محدد وجامع لمفهوم الجمال. هناك عدة تعريفات غير دقيقة للجمال غير أن من أبسط وأدق هذه التعريفات هو تعريف الفيلسوف الألماني هيجل(1770-1831): "الجمال هو التعبير الحسي عن الفكرة" كما أضاف هيجل أن الفن والدين والفلسفة هي أعلي درجات الرقي الروحي وأن الجمال في الطبيعة هو كل ما تجده الروح الإنسانية باعثاً للسرور ويقترب من ممارسة الحرية سواءً الروحية أو العقلية.

إذن فالعلاقة وثيقة بين تلك المفاهيم –الحرية والجمال والفن. إنها علاقة طردية حيث كلما زاد حب الفرد لمفهوم الحرية زاد حبه لقيم الجمال والفن لأن العلوم والتكنولوجيات والصناعات والاختراعات التي يصل إليها الإنسان إنما هي حاجة من حاجات العيش وضرورة من ضروريات الحياة. البشر جميعهم يزرعون الأرض ويحرثونها ويبنون المصانع ويخترعون الآلات ويضعون النظريات ويبنون علي ذلك ما يبنون من العلوم في الزراعة والهندسة والفيزياء، لأنهم محتاجون إلي ذلك لا يستطيعون الإعراض عنه مثلهم كمثل الذي يأكل دفعاً للجوع والذي يشرب دفعاً للعطش وكمن يقوم بأي عمل هو من حاجاته الأولية. فإذا ما حيا الإنسان حياة كهذه يكون فيها عبداً لحاجاته الأولية أصبحت الحياة بلا قيمة حين فقدت معني الحرية. إنما تكون حراً عندما تفضل ما هو أجمل علي ما هو جميل ولن تكون حراً إلا حينما تحب معاني الجمال والفن مقروءة ومسموعة وملموسة وجائلة في النفس، أي أنك حتى تكون حراً فعليك أن تتذوق الجمال بحواسك وروحك علي السواء.

موضوع كان لازم أكتبه من زمان

2007-05-18T18:21:00.000+03:00

Web log يعني سجل الشبكة ولما ندمج الكلمتين تبقى blog واتعربت وبقت مدونة أو "بلوج" وبدأت تطلع منها كلمات جديدة منها مبلوج وهو الشخص الذي يقوم بالبلوجة!! عموماً الموضوع كبير وواسع.. نظام جديد بقاله حبة حلوين والمفروض إن أغلب المدونيين أو المبلوجين عرافين إنه عبارة عن نظام لإدارة المحتوى (طبعا ده التعريف العلمي البحت) وبالبلدي كده هو مكان تقدر تسجل فيه وتكتب على راحتك اللي أنت عايزه من غير رقيب ولا رقيب أول (للناس اللي كانوا ف الجيش).. عموماً اللي أنا عارفه ومتأكد منه إن البلوج أثر في حياتي وحياة ناس كتير! يا ترى أنا بكتب الكلام ده ليه؟؟ مش عارف.. بس المهم إنى عايز أحكيلكم!!

بدأت فى طريق البلوجة بالصدفة البحتة، فأنا عرفت البلوج عن طريق (حمكشة) اللى قال لي ده اختراع عبقري تقدر تعبر فيه عن رأيك وتنشر أفكارك وكنت مستعجل جداًاًاًاًاً إني أعمل بلوج لنفسي وخايف لحسن يكون العدد محدود ويخلص!! بس الحمد لله لحقت حتة بلوج على قدّي وفتحت بلوجين على بعض لما شعرت إنى بلوجى مش مقضينى.. وبدأت زى مانتوا شايفين أبلوج (يعني أكتب ف البلوج!!) ولقيت عدد المبلوجين بيزيد كل يوم في مصر والعالم العربي وبدأت اتحمس للفكرة أكتر.. ولقيت الموضوع مغري جداً.. حسيت إن البلوج ده رافد من روافد المعرفة.. بتعرف الشباب رأيهم إيه؟ وتتعرف على ناس اهتماماتها زي اهتماماتك.. أحلامكم واحدة.. تفكيركم تقريباً واحد.. مكان بيجمعكم سوا..

من الحاجات كمان اللي بتدي ثقل للبلوج هو إنك تقدر تعلق على أي شيء غيرك بيكتبه في بلوجك أو بلوج غيرك.. ده بيخلي في نوع من التفاعل بين الناس وبعضها.. وحاجة كمان إن المدونات دي عشان تعملها وتكتب فيها وتنشر مش محتاج إنك تجيب مبرمج ولا مصمم مواقع ولا أي حاجة ولا حتى تعرف أي آلية من آليات النشر الإلكتروني! كمان مفيش حاجة اسمها مقص الرقابة ولا مش هينفع أكتب دي ولا دي.. إضافة لكل المميزات دي.. في حاجة مهمة جداً وهي إن المدون وهو الشخص صاحب المدونة اللي بيكتب لازم عشان يكتب عن موضوع معين هيحتاج يقرا عنه الأول وده بينمي الثقافة العامة عند الشباب اللي عايز يكتب ويقول حاجة..

بس المشكلة الأساسية فى موضوع البلوجات دى هيا إن في ناس متقدرش تنام ولا تاكل ولا تشرب (مش للدرجة دي طبعاً!!) عشان عايزه تقعد تكتب وتقرا كل التدوينات بتاعت المدونين التانيين وتلاقي ناس تخش وتعلق عشان تتعرف وده مش مشكلة بس المشكلة إن شيء يأثر ف حياتنا بالقوة دي لدرجة إننا منقدرش نتحرك من غير من نعمل ده وكنت بشوف ناس تتقابل عشان تتكلم عن المدونات ومين كتب إيه؟ ومين علق عند مين؟؟ ده غير إننا لسه متعلمناش إزاى نتصرف لما يكون عندنا مساحة من الحرية زى كده.. يعنى مثلاً تلاقى مدونة عنوانها (جنسى للغاية) وحاجة من عينة (مدونة الجهاد ووجوب الاستشهاد) والعكس برضو زى (الإله غير الموجود.. لازم نعمله حدود!!).. يا جدعان متخلوش الواحد يطلع عن شعوره بقى ويسب الدين والملة.. التعبير عن الرأى له أصول.. فمثلاً تلاقى ناس مصدقت تشتم وتقبّح.. مش عاجبنى الموضوع بالشكل ده ولذلك قررت الإقلاع عن التدوين حتى إشعار آخر.. ودلوقتى بعد طول غياب عن التدوين والبلوجة.. قررت أرجع.. مش عشان حاجة ولكن لأن جوايا طاقة كتابية لازم تطلع وإلا هفرقع.. هه.. كفاية عليكم كده!!

يا فرحتى بالدش

2007-05-18T18:10:00.000+03:00

شيء من الذاكرة

كنت في أجازة من الجيش وفي آخر أيام الأجازة ولأني (المفروض) أكتر واحد بيفهم ف التكنولوجيا ف البيت -زى معظمنا كشباب- لقيتهم بيسألوني عن كيفية تركيب دش وحاجات من دي.. مع العلم إن أخويا معيد في إحدي الجامعات الخاصة وحياته أكاديمية إلى حد كبير وأمي ست بيت من الدرجة الأولى وملهاش ف التليفزيون وبالنسبة لها صلاة ركعتين لله أكيد أحسن من الفرجة على شوية ناس تافهين وعندهم فراغ عاطفي!! المحصلة النهائية إن الدش ملوش استخدام كبير ولا أهمية في بيتنا.. بالنسبة لي أنا طبعا فرحت في البداية عشان قلت يلا هيبقى عندنا دش زي باقي الناس..

خلصت الأجازة ورجعت الوحدة اللي أنا فيها.. قعدت أفكر شوية مع نفسي.. اتضايقت واتخنقت عشان حسيت قد إيه التكنولوجيا بتبعدنا عن بعض على الرغم من إن الهدف الأساسي من التكنولوجيا هو العكس.. بصوا مثلا على القنوات الفضائية فتلاقوا إنها لغت تقريبا وجود السينما هي والكمبيوتر فالقنوات دي عندها قنوات سينمائية متخصصة بتعرض الأفلام الجديدة فطبعا الناس بقت تفضل تقعد ف البيت تتفرج على الأفلام الجديدة دي أحسن من إنهم يزوروا بعضهم.. أما بالنسبة للكمبيوتر فتقدر تجيب الأفلام الجديدة كلها بمجرد نزولها السينما على الكمبيوتر وتقعد تتفرج عليها لوحدك بدل ما تروح لواحد صاحبك تعبان ف المستشفى (لا قدر الله) .. أما بالنسبة للإنترنت فالمفروض إنه شبكة (اتصاااااااااااال) عالمية ولكن أنا واثق إن علاقتي ضعفت بناس كتير بسبب النت وانت أكيد عارف الكلام ده.. أنا عايز احكى على موقف صغير أوى حصل قبل كده.. كنت قاعد فى البيت على الكمبيوتر بتاعى وأخويا قاعد على الكمبيوتر بتاعه ولقيته على ال MSN كاتب عبارة بيعبر بيها عن حالة اكتئاب شديدة يرجع سببها إلى وفاة السيد الوالد (الله يرحمه).. فبدل ما أقوم اتكلم معاه.. قعدنا نكلم بعض على ال MSN.. وبعدها قمت قلت له إيه القرف اللى إحنا فيه ده.. دى وكسة إيه دى؟ فعلاً.. تطور تكنولوجيا الإتصالات بيضعف تواصل الناس مع بعضها بشكل مباشر.. بجد حاسس إننا بنبعد عن بعض أوي.. فى الوقت اللى محتاجين نقرب أكتر وأكتر.. وسبب رئيسي (التكنولوجيا)..

الواقع vs. الموروث

2007-05-15T20:44:00.000+03:00

مبدئياً القدرة على المغفرة دى حاجة رهيبة... طاقة قوية جداً ولا الطاقة النووية.. فكل اللى بطلبه هو المعذرة إذا كلامى معجبش حد أو لمس منطقة حساسة عنده (لا مؤاخذة) مش قصدى حاجة عيب.. بس أهو الكلام بيجيب بعضه..

نخش ف الموضوع على طول.. الموضوع وما فيه.. إنى كنت بتكلم مع واحد صاحبى على القهوة.. والكلام برضو جاب بعضه.. وطلعت زى البتاع كده وقلت له إن المشكلة فى مصر وبلاد تانية كتير من الدول النامية.. إن فى صراع قوى جداً جداً وحتمى بين الواقع والموروث.. إيه ده؟ ده كلام كبير أوى.. نوضح شوية فنقول إننا عندنا شوية موروثات أو نسميها تراث أو أى حاجة.. المهم إن عندنا أفكار ومفاهيم وثقافة وحاجات كتير ورثناها عن آبائنا وأجدادنا ما أنزل الله بها من سلطان وهيا الحقيقة ملهاش أى علاقة بالواقع اللى عايشينه بل بالعكس دى منفصلة عنه تماماً.. وذكرت له مثال على كده وهو موضوع الجنس واللى بعتبره من القضايا اللى بتشرح الفكرة دى بقوة ووضوح.. بدأ الموضوع يسخن والكلام يحلو.. فسألت صاحبى سؤال واضح وصريح وصادم.. لو عرفت إن أختك بتنام مع واحد هتعمل إيه؟ قام وكان هيدب فيا وكان ناوى على شتيمة! أصل الصدمة كانت جامدة عليه شوية.. المهم إنه قاللى بكل ثقة هقطع خبرها أكيد.. رديت عليه بس لو كان جد جد جد جد جدك مولود ف أمريكا وأهلك كلهم أمريكان كنت قلت حاجة تانية.. اعترض وقال لى لأ.. رديت وقلت له يا حبيبى مش مأوحة وخلاص هيا.. المجتمع الأمريكى عايش بقيم مختلفة عن عندنا.. فمثلاً جزء كبير من الناس هناك بتشوف إن البنت اللى معملتش علاقة جنسية كاملة المعانى والتفاصيل مع شاب ف سنها (مع مراعاة إن البنت متقلش عن سن ال 17) على إنها معقدة ولازم تتعالج.. فلو كانت أختك كمان مولودة هناك وعايشة معاك ومحدش نام معاها.. كنت هتدور لها على شاب من صحابك يقوم بالواجب ويفك عقدة البنت المسكينة.. قام هابب فيا وسب لى الدين والملة وكان فى شيشة قدامه كان ناوى يلبنى بيها على أم رأسى.. وبعد محاولات مريرة لتهدئة الموقف.. قلت له ما هيا دى المشكلة.. إن الناس مش قادرة تستوعب إن إحنا ولاد المجتمع.. الإنسان ابن البيئة زى ماهو معروف من سنين.. الموضوع مفيهوش صح ولا غلط.. الصح بالنسبة لك إنت.. غلط بالنسبة لناس تانية.. يعنى مثلاً البومة.. فى أوروبا لو واحد شاف بومة الصبح يبقى أكيد يومه جميل.. أيوه بيتفائلوا بالبوم.. وأنا فاكر كويس يوم ما جبت بومتين أربيهم وأكسب فيهم ثواب عندى ف البيت والمناحة اللى عملتها السيدة الوالدة وصرخت ف وشى يا أنا يا البوم ف قلب البيت.. هو إحنا ناقصين فقر.. بص عينيه مقورة ومدورة إزاى؟؟ حاجة تجيب الفقر.. والحقيقة إن البومة ملهاش ذنب لا ف إن الناس ف أوروبا يعتبروها نذير خير ولا إن الناس ف مصر يشوفوا إنها وشها يقطع الخميرة م البيت.. هيا الحكاية كلها شوية أفكار معظمها عفن وعشش عليه مليون عنكبوت ورثناها زى ما ورثنا حاجات كتير من جد لأب لابن لما العملية باظت وبقت خل ع الآخر..

الموضوع ينطبق على كل فكرة ورثناها مع وراثتنا للجينات والأسامى وشوية تفاصيل فى الحياة.. يعنى مثلاً بصوا على المنظومة الدينية لنفس الموضوع ونفس القضية.. تلاقى إن الدين الإسلامى على سبيل المثال ولأنه بيمثل أغلبية الشعب المصرى واللى هو بيخضنا ويهمنا بيقول (وأطيعوا أولى الأمر منكم).. الواقع الحياتى والاجتماعى والسياسى بيفرض علينا إننا منطعش أولى الأمر منا بغض النظر عن الأسباب اللى كلنا عارفينها.. يبقى لازم نقول إن المفهوم الدينى المنادى بإطاعة أولى الأمر مفهوم غير ملائم لواقعنا وأكيد مش هنقول عليه مفهوم مغلوط.. بس مش ماشى معانا.. فمثلاً نشوف بلد زى تونس على الرغم من صغر حجمها ومحدودية عدد السكان فيها بالنسبة لمصر نلاقى إنهم حطوا شوية قوانين جديدة فيما يسميه البعض فصل الدولة عن الدين زى ما حصل برضو فى تركيا.. ففى تونس مثلاً ممنوع تعدد الزوجات.. على الرغم من صراحة النص الدينى ف النقطة دى.. ولكن هما شافوا إن هوا ده الأصلح والأنسب لوضع العالم النهارده.. ومنعوا كمان الطلاق التعسفى!! بالرجوع إلى الآية (إن أبغض الحلال عن الله الطلاق) وفى قوانين كتير وضعتها تونس عشان تقدر تواكب التغيرات السريعة القوية اللى بتحصل ف العالم.. مش عايز أقولكم ده عامل إيه كتأثير فى تونس على وضع المرأة فى المجتمع.. قام صاحبى وأصر إنى مجنون.. وقبل ما يمشى قال جملة معاها أدركت تماماً إنه سعد زغلول كان عنده حق لما قال مفيش فايدة.. قال إيه.. مختلف معاك بشدة ومقتنع إننا لازم نرجع وخد بالك من كلمة نرجع (نتقهقر يعنى) للأصل ولكل اللى ورثناه وأكيد ده هيخلينا أحسن.. روح يا شيخ.. إلهى يعمر بيتك.. ودمتم زخراً للوطن...

مش عايز أسمع ولا كلمة

2007-05-15T19:50:00.000+03:00

شباب كتير بقى يكتب ويعبر عن رأيه.. حفلات موسيقى بديلة غير يعنى الواحدة ونص والسلو وفرق موسيقية كتير بتطلع وشباب يعمل حفلات فى الشارع زى مهرجان الكوربة ومظاهرات فى الشوارع.. ناس بتعمل فى صمت.. فيديو كليبات زى الرز ومغنيين كل يوم بيزيدوا بالعشرات.. ناس عندها حاجات مهمة وملحة لازم تتقال ومجتمع بينشأ من العدم وهو مجتمع المدونيين "الـ Blogs" اللى فرض نفسه على حياتنا بقوة وبقى له صوت وصوت عالى مسموع.. حالة من الوعى والاستيقاظ واضحة وصريحة.. ما شاء الله.. نمسك الخشب.. بس يا ترى حد سأل نفسه ليه؟ مكان زى ساقية الصاوى بقى ليه مكان تجمع شبابى؟ مسرح زى روابط بقى مكان تقدر تقدم فيه اللى انت عايزه بدون خنقة ولا روتين ولا يحزنون.. وسائط كتير مش مجالنا هنا إننا نحصرها.. لكن كلها بتوضح أد إيه فى حالة وعى وصحوة شبابية على الأرجح.. يا ترى دى حاجة كويسة ولا حاجة وحشة؟ هل تعدد أوجه الثقافة نعمة ولا نقمة؟ كل ده هل نعتبره سلبى ولا إيجابى؟ كان لازم أفكر فى هذه الحالة وهل ينفع نطلق عليها حالة حراك ثقافى ولا اضمحلال ومحاولة نهوض بائسة..

أنا مؤمن تماماً إن كلما زاد الفساد وزادت المشاكل الاجتماعية واستفحلت.. زاد معاها صوت الناس وارتفع وبقى عالى لدرجة مخيفة.. وطبعاً ميخفاش عليكم إننا عايشين فى بؤرة مشاكل وبلاوى.. ممكن تعدوا معايا .. وخلينا نحصر دائرة العد بشكل شبه تفصيلى فيما يخص التابوهات التلاتة بس:

-الجنس: مفاهيم مغلوطة خاصة بالتجربة الجنسية بين الزوج والزوجة - كبت جنسى لدى الطرفين – جهل وانعدام وعى بالثقافة الجنسية السليمة – مفاهيم مغلوطة خاصة بالزواج – انعدام وعى بنتائج العلاقات الجنسية غير المحكومة بمسمى شرعى – التحرش الجنسى – التعتيم على مشكلات زوجية أساسها جنسى

- السياسة: حدث ولا حرج.. دستور – محاولات تعتيم سياسى – بيروقراطية - انعدام وعى بالمفاهيم السياسية – مفاهيم مغلوطة لحالة الحراك السياسى – مفاهيم مغلوطة لمحاولة تحسين الوضع – فساد سياسى – حالة احتكار سياسى واضحة وصريحة تؤدى كما تؤدى ف الاقتصاد إلى كارثة – علاقات خارجية متوترة – جيران سياسيين فى حالة تأهب – معارضة مش متوازنة ومش قوية كفاية – سلطة قضائية صورية – مشروعات قرارات غريبة الشكل والمعنى

- الدين: برضو حدث ولا حرج.. غليان من تحت ل تحت – سلطة مدمرة أخطر بكتير من قنبلة نووية لو الحبل اتساب لها شوية – تطرف دينى واضح - نفاق وتظاهر بالتدين عشان نمشى على الموضة - مسئولين كبار عن هيئات دينية ذات شأن لهم آراء غريبة الشكل والمضمون – عدم فهم للمعانى الدينية الأساسية – تدقيق فى صغائر الأمور على الرغم من إن الحاجات الكبيرة الناس قدامهم سنين على ما يفهموها ويعرفوها – افتقاد حالة السلام الداخلى ووجود حالة غريبة شاذة على المجتمع المصرى وهيا حالة الشحن الدينى المستغل خارجياً بقسوة وحرفنة

طبعاً ناهيك عن المشاكل الاجتماعية إذا كان تعليم ولا صحة ولا سكن ولا مرافق ولا خدمات ولا البطالة ولا الفراغ.. متعدش.. وكمان عندك شوية مشاكل مادية وعلمية وثقافية وأسرية وانفعالية وجدانية ومشكلة قيم وأخلاقيات أصبحت شبه منعدمة ولكن فى النهاية بنقول يارب استرها وكمان حالة الحراك الثقافى والوعى عند الشباب اللى كل يوم بيتضاعف بيدينا أمل.. ونقول كمان إن كل الحضارات اللى وصلت لقمة مجدها جه عليها الوقت وسقطت واندثرت.. لكن فى أقصى عصور الظلام بيتولد النور.. بس النور عمره ما كان بيجى من بره.. النور بيكون دايماً من جوه.. كل المطلوب شوية صبر على حبة حماس على نقطتين تركيز.. التغيير بيبدأ فى المرايه..

إضافة أخيرة: بالنسبة للفرق الموسيقية والكليبات والمغنيين والمغنيات اللى يبزيدوا كل يوم.. اعتقد أن هيكون فى وقت يتم فيه ما يسمى فى الأحياء بالانتقاء والانتخاب الطبيعى بين الكائنات.. يعنى البقاء للأقوى والأصلح.. ودمتم زخراً للوطن..

يعنى إيه كلمة وطن؟

2006-03-07T10:51:00.000+02:00

فعلا اللى بيحصل فى مصر اليومين دول شيء مش طبيعى. طبعاً كلنا حاسيين بالموضوع فأنا كنت طالع النهارده الشغل ف أمان الله وبعدين رحت أقعد شويه مع الشباب بعد ما رشيت ميه وقلت يا فتاح يا عليم يا رزاق يا كريم وصبحت على منى (وبالمناسبة النهارده عيد ميلادى) وكنت داخل أغنى ومبسوط قعدت مع تامر ونادر وماجد ومش فاكر ايه اللى فتح الموضوع لكنه اتفتح وخلاص وقال لنا تامر على فضيحة عمر أفندى بصوا على اللينك ده لو مش عارفين حاجة عن الموضوع http://www.al-araby.com/articles/999/060305-999-inv04.htm

إيه بجد المسخرة دى؟ مسرحية هزلية من 7000 فصل مش ممكن تبطل تضحك من الكوميديا السوداء

Welcome Back

2005-12-08T13:17:00.000+02:00

I'm back again
I just finished my military service
Welcome Back to myself
Now I'm ready for you

Two Singers I love

2005-09-01T13:56:00.000+03:00

Mounir and Imam

Music is the organized movement of sounds, particularly pitches, through a continuum of time. While the general principles have been retained, the tradition of the Egyptian music has changed throughout the late years. The lyrics, tunes and even the effect of that music on audience differed. There are many similarities and differences between Mohammed Mounir and Sheikh Imam as two Egyptian popular singers of two different eras in Egypt.

As for Imam's lyrics, they are direct and they tackle serious problems. For example, the song titled "Etgamaao El-Oshak" (the Lovers Have Gathered), hits on the right nail as it deals with the feelings of oppression caused by capturing many Egyptians those days. Moreover, Imam's lyrics have weighty notions about freedom, revolution and patriotism. For instance, the song "El-Mamnoat" (The Don'ts) expresses the affections of a patriot person who is prevented from traveling, speaking and the feeling of displeasure.

Concerning Imam's tunes, they can be described as simple tunes. In Imam's songs, two instruments only were used, lute and tambourine. Those simple tunes are to reach people's hearts easily. On the other hand, being uncomplicated, the tunes of Imam's songs became easy to keep. In addition to this, Imam's tunes can also be called "active" tunes as they let one move with them. Those active tunes are suitable for the subjects and lyrics sung by Sheikh Imam.

Regarding the effect of Imam's songs on audience, his songs affected people in a strange way. For example, some of the demonstrations in Egypt took place after listening to one of Imam's songs. Furthermore, people loved Imam's singing and they recited his songs. Some people keep his songs by heart until now. In addition to this, some people who loved Imam's songs kept his tapes and records despite of the government's resentment.

With regard to Mounir's lyrics, they are no more direct when compared to those of Imam. In other words, songs became full of symbols that imply deeper meanings. For example, the song "Hadouta Masria" (An Egyptian Tale) carries many sentences that say something and mean something else at the same time. Both Mounir and Imam sung some of their songs written by the same composer. For instance, Ahmed Foad Negm who wrote an album, "El-Malek Howa El-Malek" (A King is the King), for Mounir, wrote most of Imam's songs.

As to Mounir's tunes, they are more sophisticated if compared to Imam's simple ones. It is because of the development of the musical instruments and because Mounir depended for some time on foreign musicians with Western instruments. In spite of the sophistication of the tunes in Mounir's songs, just like Sheikh Imam, his songs are kept easily. Over and above, Mounir's melodies are mostly faster than Imam's ones.

In respect of the effect of Mounir's songs on audience, people love his songs and recite them day and night. Unlike Sheikh Imam, Mounir's songs do not affect people to the degree that they take any reaction towards what is said in those songs. Although both Mounir and Imam's songs tackle, nearly, the same subjects, the effect of their singing on people is not the same.

It is quite clear that the Egyptian music has changed in many ways and for different reasons in the late years. This is illustrated through comparing and contrasting Mohammed Mounir and Sheikh Imam as two Egyptian singers representing two distinctive periods in Egyptian music.

صرخة للمطر الهادئ

2005-08-31T14:30:00.000+03:00

صرخة للمطر الهادئ

أمطار.. رعد.. برق.. بشر يهرولون كل متخذا ساتره.. منهم من احتمى بجريدة اليوم التي قرأها وهو جالس ينتظر ساعات اللاعمل المملة.. منهم من كان أسعد حظا وأدرك غزارة الأمطار وهو في فراشه فسار مستترا تحت مظلته وأما أنت فتسير غير عابئ بكل هؤلاء إنك من عالم آخر.. المطر يهطل بغزارة شديدة.. حبات المطر تكاد تخرق الأجسام.. مازلت سائرا تبدو بلا هدف.. لا يسترعي بصرك كل ما يحدث.. تقف لحظة، بل أقل من ذلك.. تنظر في الساعة.. تستكمل المسير.. معدتك تخاطبك وحتى هي لا تسمع.. تقف هذه المرة مدة أطول، عند متسول جالس على الرصيف غير عابئ بالمطر والناس، تنظر له وتتمعن.. طالت نظرتك وهو لم يتنبه لوجودك.. تمد يدك في جيبك وتخرجها وتضع ما أخرجت في جيب الجلباب التي يرتديها الرجل.. سرعان ما تبللت النقود كما كل ما هو مبتل. لم يلتفت إليك الرجل بل ظل مستقبلا الأرض بوجهه. تستكمل المسير.. تصل إلى محطة الرمل.. على الناحية المقابلة من الطريق، يقف رجل يرتدي ثيابا صيفية خفيفة ويبدو في كل مظاهره رجلا عاديا في منتصف الأربعينيات من عمره. يقف ثابتا.. تنظر إليه.. يفك الرجل زر البنطلون الجينز الذي يلبسه ثم يفتح السوسته ويدلي البنطلون حتى ركبتيه ثم ينزل سرواله الداخلي كاشفا عورته للناس الذين لا يكترثون له.. الكل يهرول ليحمي نفسه من المطر القاسي. يقف هكذا للحظات ثم يرفع سرواله الداخلي والبنطلون ويزره ويقف هادئا وكأن شيئا لم يكن...

مازال المطر يهطل بقسوة.. السماء تضيء أضواء خاطفة على فترات متفاوتة وتصدر أصواتا تعلن عن شيء ما تريد أن تبوح به. مازلت تنظر للرجل الواقف في الجهة المقابلة وهو يكرر ما فعله بكل هدوء وثقة.. أنت أيضا تبدو غاية في الهدوء المزدحم.. تواصل خطواتك المتأنية.. تصل للمقهي.. أي مقهي.. يجلس إلى جوارك رجل يرتدي حلة رمادية ونظارة للقراءة وإلى جواره حقيبة أنيقة وأمامه فنجان من القهوة (السادة).. أمامك شيخ جاوز السبعين يرتدي جلبابا مترهلا أكل عليه الدهر وشرب وإلى جوار هذا الشيخ شابان في مقتبل العمر يرتديان ثيابا (على الموضة) ويدخنان شيشة معسل تفاح وأمامهما كتاب ومجموعة أوراق مبعثرة. إلى جوار هذين الشابين... يقطع تفحصك لمن بالمكان وجود شخص يقف أمامك مباشرة وقبل أن تقفز إلى احتمال أن يكون هذا هو النادل، يقول لك بصوت أجش أنت له كاره:
- تشرب حاجة يا أستاذ؟
تتنهد وتجيب بهدوئك المعطوف عليه:
- قهوة مظبوطة و... و... حجر طومباك
- تأمر بأي حاجة تاني؟
- لأ شكرا
قبل أن يبتعد النادل كثيرا، تنهض وتخرج مبتعدا عن المقهي.

مازالت السماء تحمل الكثير. مازلت تسير، لقد قطعت شوارعا وشوارع. تقريبا، لم يعد بالشوارع مارة سواك. ثيابك تشبعت بالمياه وبدأت تنضح. لا تزال سائرا.. تقترب من المنزل، تقف قليلا أمام البرج، تنظر إلى شباك غرفتك الذي تركت نوره. لم يقف البواب كعادته عندما رآك، تنظر للبواب.. لم يهتم.. لا تزال تحتفظ بهدوئك المعهود.. تفتح باب المصعد.. تسجل الدور الحادي عشر.. تفتح الباب وتخرج تاركا الباب ليغلق بلا مبالاة وهدوء.. تفتح باب الشقة.. تدخل.. ثيابك بللت السجادة الفخمة المفروشة في مدخل المنزل.. تسير نحو البلكونة.. تنظر للعصفور المقيد بالقفص يكاد يتجمد من البرد.. لأول مرة تفقد هدؤئك وتصرخ:
- برضو مش عايز تنفذ الأوامر
يطير العصفور مرتعدا إلى الجهة المقابلة البعيدة عنك فتصرخ:
- بقولك انتباه.. انتباه يا رمة الأرمام
العصفور يرتعد بشدة من الخوف والبرد.. تضرب بيدك على القفص وتصرخ:
- لآخر مرة بقولك نفذ الأمر
يطير العصفور بهستيريا داخل القفص المزين.. يتخبط جسده الضعيف بقضبان القفص فتتلطخ زينة القفص بدماء العصفور.. تنتظر قليلا ثم تقول بصوت عال للغاية:
- أنت مدور مكتب يا بن الـ...
تستدير لتدخل الشقة ثم تعود مرة أخرى ضاربا القفص وصارخا:
- 30 يوم حبس
مرة أخرى، تستدير لتدخل الشقة، تعود وتمسك القفص بهدوئك القاسي وتسير نحو سور البلكونة وتخرج يديك ممسكة بالقفص ثم تتركه يسقط وتقول في نفس الهدوء:
- عشان تحرم تكسر الأوامر
تغلق باب البلكونة.. تسير في الشقة الواسعة.. تدخل غرفة النوم.. تلقي بجسدك المبتل على السرير.. النور مضاء.. لا تستطيع النوم..

مازالت السماء تهطل بغزارة....

7-3-2005
الساعة 16:36

قربي يا مدام ك..... حماده بسبعة ونص

2005-08-30T13:15:00.000+03:00

فرصة.. أوكازيون للي عايز يخس

ساعات موضوع الوزن الزايد بيسبب مشكلة لبعضنا كشباب.. وممكن يسبب إحراج كبير ويمكن يوصل لإنه يعمل عند بعض الشباب عقدة بشنيطة ويضطر ساعتها يقول: أنا مش تخين فشلة... أنا رفيع عصاية! دلوقتي تقدر تستغنى عن كل ده وتقرا شوية نصايح لو يبقى عندك شوية إرادة تقدر تخليهم حاجة عادية بتعملها في دايرة تصرفاتك العادية.

حاول تنقص كمية الدهون اللي بتستخدمها في الأكل: ده لو بتعرفوا تطبخوا أصلا
أبعد عن هوس أنظمة الرجيم الغريبة: تاكل قشرة لب الصبح والظهر تاكل القشرة التانية وبالليل تقعد تعيط م الجوع
لازم لازم لازم تاكل فاكهة على الأقل مرتين في اليوم: إذا عايز تخس فعلا
بلاش الأكل السريع الخفيف: لقمة ع السريع كده
العب شوية تمرينات بطن بسيطة مرتين ف الأسبوع
متوزنش نفسك كل يوم: عشان العمر الافتراضي للميزان
أدي لنفسك جايزة لما تخس 5 كيلو: بس متكونش أكل برضو
حاول تاكل ببطء شديد.. يعني تاكل الوجبة ف نص ساعة.. إزاي معرفش!!؟
استخدم أطباق حجمها صغير
أوعي تاكل قدام التليفزيون: أصل انتوا عارفين التليفزيون يفتح النفس أوي
أهم وجبة تحافظ عليها كل يوم هي وجبة الفطار
متاكلش أبدا وانت بتقرا
ممنوع أكل حلويات غير مرة واحدة كل شهر
حاول تقلل الملح واستخدم بداله أي بهارات تدي طعم للأكل
لازم تاكل تلات أنواع من الخضروات كل يوم
أوعى تاكل وأنت واقف: لحسن الأكل يروح ف الرجلين
في الغالب أصحاب الأوزان الزايدة لما يتعصبوا يطلعوا غلهم ف الأكل.. حاول من هنا ورايح لما تبقى مضغوط عصبيا تتمشى شوية
لازم تشرب لبن أو تاكل حاجة من منتجات الألبان عشان الكالسيوم ده مهم جدااااا: ممكن تجيب حليب منزوع الدسم أو نص دسم
حط طبق شوربة كبير ومولع قدامك ع السفرة: عشان عقبال م يبرد تكون شبعت
قلل النشا في أكلاتك
حاول تشرب ميه على قد ما تقدر كل يوم
حاول تقلل السكر والعيش
لو بتحب البيض يبقى كل البياض بس
الأكلات المشوية دايما بتبقى نسبة الدهون فيها أقل

وف النهاية كل شيء ف أوله صعب لكن مع التعود بيبقى الموضوع ف اللذيذ ومشوار المائة كيلو بيبتدي بجرام

2005-08-30T12:48:00.000+03:00

أنا جيت يا رمضان

طبعا انتوا عارفين إني بقالي كتير متوقف عن التدوين بس ده غصب عني والله بسبب وجودي ف الجيش بس أنا أرجع لكم بسرعة عشان كلها أيام (حاجة وتمانين يوم)

حسيت إن في ناس كتير يهمها الموضوع وعلى رأي المثل الكوري اللي بيقول (معرفوش بالعربي) It is for good... so be it
لأن مفيش اتنين ف الدنيا عندهم نفس الجينات وطبيعة تركيبهم العضلي.. فمينفعش نطبق نفس التمارين على كل الناس.. يعني مينفعش واحد ضايع (وزنه 40 كيلو يلعب نفس التمارين اللي بيتمرنها واحد وزنه 110 كيلو) لكن عشان مفيش في الرياضة بالذات حاجة اسمها مستحيل فانت تقدر تكون بالشكل اللي أنت عايزه.. في 3 قواعد تعتبر مقدسة في الرياضة دي - اللي أنا بعتبرها رياضة العصر لأنها مبتستهلكش وقت كبير من اليوم وخصوصا إن الوقت دلوقتي بقى مستهلك من غير حاجة- وهم التركيز وبذل أقصى جهد ممكن والالتزام. 3 حاجات يبان إنهم كلام فاضي بس بجد هما دول السر بتاع لعبة كمال الأجسام.. يعني متبصش على حد من اللي صورهم فوق وتقول دول مش بني آدمين.. دي مش معجزة ولا الناس دي بتاكل أكل من المريخ بس هما بيعملوا زي ما الكتاب بيقول

أولا: التركيز

ممكن يكون في واحد بيتمرن 3 ساعات كل يوم ومفيش فايدة.. برضو عامل زي البرص المضروب على قفاه!! وده لأنه مش مركز ف التمرين.. يعني إيه مركز ف التمرين؟ يعني بيحس بالعضلة.. اختصارا للوقت لو عايز تحس إنك مركز حاول تجرب تغمض عينك ف التمرين وتتخيل شكل العضلة بعد ما تتشكل ومن ضمن التركيز برضو إنك متهرجش في التمرين وعموما التركيز في أي شيء في الحياة هو سر النجاح

ثانيا: بذل أقصى جهد ممكن

الشباب بيفتكروا إنهم طالما حافظين التمرين صح وموظبين وماشيين على نظام غذائي ملوش حل يبقى كده خلاص العملية بقت سهلة.. لكن مفيش حاجة بتيجي بالساهل كده.. يعني ممكن نوصف تمارين كمال الأجسام بإنها ممتعة أو جميلة بس مش سهلة أبدا.. المفروض إنك ف التمرين تموت نفسك (جيب آخرك) بس لاحظ إن ده بيكون بعد الفترة الأولى (3 حصص أو تمرينات متكاملة تسخن فيها جسمك لو بقالك مدة كبيرة مبطل رياضة أو لو ملعبتش أي رياضة قبل كده)

ثالثا: الالتزام
الالتزام حلو ف كل حاجة ف حياتنا وعلى فكرة الالتزام مش معناه إنك تبقى رخم وتنح ولا مؤاخذة.. عشان في ناس بتفهم الالتزام حاجة من 2: إنك تربي دقنك وتصلي ف الجامع أو تبقى عامل زي أبلة نظيرة.. بس الفكرة إن الالتزام معناه إنك تروح التمرين بانتظام وتلتزم بالنظام الغذائي والتمارين اللي مدربك هيقولك عليها وهكذا.. وكل ده عشان تكون واحد عادي جدا جسمه متناسق وشكله مقبول وزي ما هو عايز.. مش عشان تبقى شوارزنجر

الموضوع مش معقد ولا فيه شغل عفركوش (لا سحر ولا شعوذة) الموضوع كله محتاج واحد بيفهم وعنده إرادة وهو يقدر يطبق القواعد المقدسة التلاتة للعبة كمال الأجسام عشان يشوف نفسه في المراية ويبقى مبسوط

إنما

2005-06-21T00:40:00.000+03:00

!!!حدثت بالفعل

كنت نايم ع الرصيف
ووشي كان للسما
مكنش في شيء مخيف
بس في شيء إنما

قالولي إصحى الطابور
قمت واقف انتباه
بصيت ع السما والنور
وقلت سبحان الإله

!جنبي السلاح المتين

حسيت كأنه شيء خفيف
جيت أشيله وبالإيدين
للدرجة دي بقيت ضعيف

بصيت تاني للسما
عرفت إيه الإنما
جوايا إحساس نما
بإني عايش... إنما

ومعذرة لكم أهل الشعر.. ولكنه استيقظ ليكتب هذه وينام بعد الطابور
وشكرا

2005-05-27T13:16:00.000+03:00

هذا هو محمد عفيفي مطر ذلك الشاعر العبقري الذي كنت أتمني أن تعطيه الحياة الثقافية في مصر والعالم العربي حقه كاملا.....

يا لك من إنسان ذو قلب كبير (كما يؤكد المقربون له) وشاعر جد قدير....

إن محمد عفيفي مطر شاعر له عالمه الخاص مكتمل العناصر تدخل إلى عالمه فتعيش فبه وتبتعد عن كل العوالم الخارجية
posted by Bashkateb

هذا الليل يبدأ

2005-03-18T13:51:00.000+02:00

دهر من الظلمات أم هي ليلة جمعت سواد
الكحل والقطران من رهج الفواجع في الدهور!
عيناك تحت عصابة عقدت وساخت في
عظام الرأس عقدتها،
وأنت مجندل – يا آخر الأسرى...
ولست بمفتدى..
قبلادك انعصفت وسيق هواؤها وترابها سبيآ –
وهذا الليل يبدأ،
تحت جفنيك البلاد تكومت كرتين من ملح الصديد
الليل يبدأ
والشموس شظية البرق الذي يهوي إلى
عينيك من ملكوته العالي،
فتصرخ، لا تغاث بغير أن ينحل وجهك جيفة
تعلو روائحها فتعرف أن هذا الليل يبدأ،
لست تحصي من دقائقه سوى عشر استغاثات
لفجر ضائع تعلو بهن الريح جلجلة
لدمع الله في الآفاق..
هذا الليل يبدأ
فابتدئ موتا لحلمك وابتدع حلما لموتك
أيها الجسد الصبور
الخوف أقسى ما تخاف.. ألم تقل؟!
فابدأ مقام الكشف للرهبوت
وانخل من رمادك، وانكشف عنك،
اصطف الآفاق مما يبدع الرخ الجسور..
27/3/1991
معتقل طرة / محمد عفيفي مطر

مرة أخرى أذكر نفسي وإياكم بعدل الإله ونتمنى ونعمل جاهدين حتى نرى هذا الليل ينتهي

نداءات على الجدران لم تقشرها الاظافر ولم يغسلها المطر

2005-03-17T14:36:00.000+02:00

اختبىء ياقطاراً يهرول في الحلم،
صوتك يخلع ريش النشاز الملون، يسقط بين
الصدى والصدى، وتصنفره شفرات الأظافر،
يدخل أوركسترا الأسر.
فلتختبىء ياقطار يهرول في الحلم،
فالأرض مكشوفة المحطات مفتوحة تحت ضوء السفر
اختبىء فالإقامة مأهولة بوحوش القرابة
والألفة الناعمة.

جسد للعشيرة، اعضاؤه انفرطت
كالعناقيد في ورق الملصقات- الأفيشات- وهج
النيون المشاكس.
حط الظلام
فهل ينفر النهد تحت الأكف وتلتم رهط العناق
الصريح وهل يفتح الليل مضيفه للتخاصر
والجنس؟ هل تفلت الشهقات المقيمة في اللون، هل؟

تنفست حقائب الوطن، يالله،
هل يملك كل هذه الملابس الداخلية؟!
وبعثرها في الريح، فهل كل هذه الألوان من
شمس واحدة؟!
وغربت الشمس
فكل طريق صباح وكل صباح طريق.

العصافير تنسج اعشاشها في
حديد الشبابيك والارفف الخشبية في المكتبات
وفي الحافلات المليئة بالزحمة الضاحكة
والعصافير تنسج اعشاشها تحت ليل من
الشعر المستعار وفي خوذ الشهداء
واحذية الهاربين

أسرعوا اسرعوا.. فالبلاد القديمة
ركضت خلفكم، واكتبوا واكتبوا.. فالبلادالقديمة
قطعت شجر الأبجدية.

مطلع جاهلي يجيء
تطلع الشمس في الذاكرة
تحت ايقاعه يستضىء
وطن للخراب الطلولي،
نهر تجررّه الصرخة الغائرة.

صخب، وبلاد تجلجل في حجر السمع،
والرعد يزرع أعضاءه..
انتظروا.. تصهل الخيل في الأروقة.
محمد عفيفي مطر (الشاعر الذي ظلمته حياة الناس وأنصفه الشعر)

وتحرك المترو

2005-03-17T14:33:00.000+02:00

تكاد تخلو الشوارع من المارة، تهدأ حركة المرور،يخيم الهدوء علي المكان، لا تسمع صوتها إلا إذا اقتربت، أسمع أصوات لمبات الجاز، يجلس باعة الفاكهة بلمباتهم التي تقتل الصمت الرهيب، تقترب خطواته أكثر من المحطة، يري شخصاً آخر، إنه متجه إلي المحطة أيضاً، يصل، يقطع التذكرة، يقف منتظراً.

يحمل الشيخ أكياساً كثيرة، تفوق وزنه بقليل تقريباً، ويحس أنه سيسقط من شدة التعب، إنه رجل قوي، أبدت يداه اعتراضهما؛ فكادتا أن تلامسا الأرض من ثقل الحمل عليهما. يرتدي جلباباً أبيض، لحيته ناصعة البياض، يبدو أقصر من طوله الحقيقي؛ لإنحناء ظهره، جسده نحيل، يبدو في عينيه أثر الزمن، فيهما مسحة حزن، يبدو أنه يعيش وحده، وأغلب الظن أنه تجاوز العقد السابع من عمره ببضع سنوات.

تشير عقارب ساعة محطة الملك الصالح إلي الساعة الواحدة إلا الربع بعد منتصف الليل. يقف علي رصيف المحطة المؤدي إلي اتجاه حلوان ناظراً إليه في ترقب، يسير علي الرصيف المقابل، خطواته متمهلة وثقيلة، يتجه نحو درجات السلم، يأخذ في متابعته بعناية، يسرع من خطاه، الحمل لا يساعده، لا يستطيع أن يبعد عينيه عن مراقبته، يشق نور مترو الأنفاق القوي ظلام الليل الحالك.

يمر الناس إلي جواره مسرعين للحاق بهذا المترو، فهذا هو آخر مترو. يصل المترو المحطة، يتوقف فاتحاً أبوابه لمن يرغب في استقلال إحدى عرباته، تبقي للشيخ في هذه اللحظة من درجات السلم درجتان أو ثلاث، يطلق سائق المترو صفارة الإنذار بغلق الأبواب، يُغلق الباب قبل أن يلحق به الشيخ، يقف خلف زجاج باب المترو ينظر لهذا الشيخ في تعجب؛ ترتسم علي شفتيه ابتسامة عريضة، وتحرك المترو بطيئاً ثم ازدادت سرعته حتى اختفت هذه الابتسامة المحيرة.

دوما سأثرثر

2005-02-06T13:29:00.000+02:00

نافذة مفتوحة على أعينكم بشكل مباشر

تتملكني الرهبة ولكن تظل تلتهمني الرغبة

أكتب لأني أردت الإستفادة

أغمس ريشتي في الوسادة

واستخرج منها أحلامي

بعضا يُفهم من كلامي

قال فلان وقال علان

"نامي جياع الشعب نامي"

"حرستك آلهة الطعام "
مجانين .. يقال: خذوها من أفواههم

عدسة مكبرة وعقرب صغير

2005-02-06T13:22:00.000+02:00

عدسة مكبرة تقرب لنا الصورة وأكيد الصورة مش هتكون أحسن من الأصل لكن أنا بكلم اللي مشفش الأصل يشوفوالعقرب الصغير هو عقرب الثواني العقرب اللي ملوش أي قيمة في حياتنا بس هو الحقيقة الثابتة التي تثبت أن الكون كله بيدور وتقدر تتأكد من الحقيقة دي ف كل ثانية.
قصص قصيرة (نوافذ مفتوحة على الحياة) فرصة أقدر أعبر بيها عن جزء مدفون جوايا بألوان وأصوات وحركات. كل شيء متاح على الورق كل شيء مسموح به .. بتكون إله وتخلق شخصيات .. تقدر تبقى شخصية منهم.. تقدر تعمل حاجات كتير وأنت بتكتب؟؟
متيجي نشوف؟

نظرة من عين كفيف وثرثرة مجنون

2005-02-06T06:25:00.001+02:00

بحثت كثيرا في دفاتر رأسي عن عنوان عن كلام أقدم به هذه الصفحة نظرت لنفسي لأجدني كفيفا لا أعرف فــي الحياة سوى ما يحدث أمام عيناي أو يقع تحت مسامعي أو أقرأه في كتاب أو اسمعه في غـــنوة فوجدتني بعد كل ما عانيـت أنني كفيف يريد أن ينظر نحو العالم بعيناه هو.. ثم وجدتني تارة أكتب بالفصحى ومره اتكلم عامي مرة أكتب وأنا مهموم فيكون حديثي حكيما قد اصفرت أوراق حياته ومره تلاقوني الشاب الروش اللي بيهزر ويضــــــــحك وبيقول لكم كبروا دماغكم محدش واخد منها حاجة فشعرت بالجنون ولكن لم تزل لدي الرغبة في الحديث فإليكم نظرة مــــــــــن عين كفيف وثرثرة مجنون