يا فرحتى بالدش

شيء من الذاكرة

كنت في أجازة من الجيش وفي آخر أيام الأجازة ولأني (المفروض) أكتر واحد بيفهم ف التكنولوجيا ف البيت -زى معظمنا كشباب- لقيتهم بيسألوني عن كيفية تركيب دش وحاجات من دي.. مع العلم إن أخويا معيد في إحدي الجامعات الخاصة وحياته أكاديمية إلى حد كبير وأمي ست بيت من الدرجة الأولى وملهاش ف التليفزيون وبالنسبة لها صلاة ركعتين لله أكيد أحسن من الفرجة على شوية ناس تافهين وعندهم فراغ عاطفي!! المحصلة النهائية إن الدش ملوش استخدام كبير ولا أهمية في بيتنا.. بالنسبة لي أنا طبعا فرحت في البداية عشان قلت يلا هيبقى عندنا دش زي باقي الناس..

خلصت الأجازة ورجعت الوحدة اللي أنا فيها.. قعدت أفكر شوية مع نفسي.. اتضايقت واتخنقت عشان حسيت قد إيه التكنولوجيا بتبعدنا عن بعض على الرغم من إن الهدف الأساسي من التكنولوجيا هو العكس.. بصوا مثلا على القنوات الفضائية فتلاقوا إنها لغت تقريبا وجود السينما هي والكمبيوتر فالقنوات دي عندها قنوات سينمائية متخصصة بتعرض الأفلام الجديدة فطبعا الناس بقت تفضل تقعد ف البيت تتفرج على الأفلام الجديدة دي أحسن من إنهم يزوروا بعضهم.. أما بالنسبة للكمبيوتر فتقدر تجيب الأفلام الجديدة كلها بمجرد نزولها السينما على الكمبيوتر وتقعد تتفرج عليها لوحدك بدل ما تروح لواحد صاحبك تعبان ف المستشفى (لا قدر الله) .. أما بالنسبة للإنترنت فالمفروض إنه شبكة (اتصاااااااااااال) عالمية ولكن أنا واثق إن علاقتي ضعفت بناس كتير بسبب النت وانت أكيد عارف الكلام ده.. أنا عايز احكى على موقف صغير أوى حصل قبل كده.. كنت قاعد فى البيت على الكمبيوتر بتاعى وأخويا قاعد على الكمبيوتر بتاعه ولقيته على ال MSN كاتب عبارة بيعبر بيها عن حالة اكتئاب شديدة يرجع سببها إلى وفاة السيد الوالد (الله يرحمه).. فبدل ما أقوم اتكلم معاه.. قعدنا نكلم بعض على ال MSN.. وبعدها قمت قلت له إيه القرف اللى إحنا فيه ده.. دى وكسة إيه دى؟ فعلاً.. تطور تكنولوجيا الإتصالات بيضعف تواصل الناس مع بعضها بشكل مباشر.. بجد حاسس إننا بنبعد عن بعض أوي.. فى الوقت اللى محتاجين نقرب أكتر وأكتر.. وسبب رئيسي (التكنولوجيا)..