الواقع vs. الموروث

مبدئياً القدرة على المغفرة دى حاجة رهيبة... طاقة قوية جداً ولا الطاقة النووية.. فكل اللى بطلبه هو المعذرة إذا كلامى معجبش حد أو لمس منطقة حساسة عنده (لا مؤاخذة) مش قصدى حاجة عيب.. بس أهو الكلام بيجيب بعضه..

نخش ف الموضوع على طول.. الموضوع وما فيه.. إنى كنت بتكلم مع واحد صاحبى على القهوة.. والكلام برضو جاب بعضه.. وطلعت زى البتاع كده وقلت له إن المشكلة فى مصر وبلاد تانية كتير من الدول النامية.. إن فى صراع قوى جداً جداً وحتمى بين الواقع والموروث.. إيه ده؟ ده كلام كبير أوى.. نوضح شوية فنقول إننا عندنا شوية موروثات أو نسميها تراث أو أى حاجة.. المهم إن عندنا أفكار ومفاهيم وثقافة وحاجات كتير ورثناها عن آبائنا وأجدادنا ما أنزل الله بها من سلطان وهيا الحقيقة ملهاش أى علاقة بالواقع اللى عايشينه بل بالعكس دى منفصلة عنه تماماً.. وذكرت له مثال على كده وهو موضوع الجنس واللى بعتبره من القضايا اللى بتشرح الفكرة دى بقوة ووضوح.. بدأ الموضوع يسخن والكلام يحلو.. فسألت صاحبى سؤال واضح وصريح وصادم.. لو عرفت إن أختك بتنام مع واحد هتعمل إيه؟ قام وكان هيدب فيا وكان ناوى على شتيمة! أصل الصدمة كانت جامدة عليه شوية.. المهم إنه قاللى بكل ثقة هقطع خبرها أكيد.. رديت عليه بس لو كان جد جد جد جد جدك مولود ف أمريكا وأهلك كلهم أمريكان كنت قلت حاجة تانية.. اعترض وقال لى لأ.. رديت وقلت له يا حبيبى مش مأوحة وخلاص هيا.. المجتمع الأمريكى عايش بقيم مختلفة عن عندنا.. فمثلاً جزء كبير من الناس هناك بتشوف إن البنت اللى معملتش علاقة جنسية كاملة المعانى والتفاصيل مع شاب ف سنها (مع مراعاة إن البنت متقلش عن سن ال 17) على إنها معقدة ولازم تتعالج.. فلو كانت أختك كمان مولودة هناك وعايشة معاك ومحدش نام معاها.. كنت هتدور لها على شاب من صحابك يقوم بالواجب ويفك عقدة البنت المسكينة.. قام هابب فيا وسب لى الدين والملة وكان فى شيشة قدامه كان ناوى يلبنى بيها على أم رأسى.. وبعد محاولات مريرة لتهدئة الموقف.. قلت له ما هيا دى المشكلة.. إن الناس مش قادرة تستوعب إن إحنا ولاد المجتمع.. الإنسان ابن البيئة زى ماهو معروف من سنين.. الموضوع مفيهوش صح ولا غلط.. الصح بالنسبة لك إنت.. غلط بالنسبة لناس تانية.. يعنى مثلاً البومة.. فى أوروبا لو واحد شاف بومة الصبح يبقى أكيد يومه جميل.. أيوه بيتفائلوا بالبوم.. وأنا فاكر كويس يوم ما جبت بومتين أربيهم وأكسب فيهم ثواب عندى ف البيت والمناحة اللى عملتها السيدة الوالدة وصرخت ف وشى يا أنا يا البوم ف قلب البيت.. هو إحنا ناقصين فقر.. بص عينيه مقورة ومدورة إزاى؟؟ حاجة تجيب الفقر.. والحقيقة إن البومة ملهاش ذنب لا ف إن الناس ف أوروبا يعتبروها نذير خير ولا إن الناس ف مصر يشوفوا إنها وشها يقطع الخميرة م البيت.. هيا الحكاية كلها شوية أفكار معظمها عفن وعشش عليه مليون عنكبوت ورثناها زى ما ورثنا حاجات كتير من جد لأب لابن لما العملية باظت وبقت خل ع الآخر..

الموضوع ينطبق على كل فكرة ورثناها مع وراثتنا للجينات والأسامى وشوية تفاصيل فى الحياة.. يعنى مثلاً بصوا على المنظومة الدينية لنفس الموضوع ونفس القضية.. تلاقى إن الدين الإسلامى على سبيل المثال ولأنه بيمثل أغلبية الشعب المصرى واللى هو بيخضنا ويهمنا بيقول (وأطيعوا أولى الأمر منكم).. الواقع الحياتى والاجتماعى والسياسى بيفرض علينا إننا منطعش أولى الأمر منا بغض النظر عن الأسباب اللى كلنا عارفينها.. يبقى لازم نقول إن المفهوم الدينى المنادى بإطاعة أولى الأمر مفهوم غير ملائم لواقعنا وأكيد مش هنقول عليه مفهوم مغلوط.. بس مش ماشى معانا.. فمثلاً نشوف بلد زى تونس على الرغم من صغر حجمها ومحدودية عدد السكان فيها بالنسبة لمصر نلاقى إنهم حطوا شوية قوانين جديدة فيما يسميه البعض فصل الدولة عن الدين زى ما حصل برضو فى تركيا.. ففى تونس مثلاً ممنوع تعدد الزوجات.. على الرغم من صراحة النص الدينى ف النقطة دى.. ولكن هما شافوا إن هوا ده الأصلح والأنسب لوضع العالم النهارده.. ومنعوا كمان الطلاق التعسفى!! بالرجوع إلى الآية (إن أبغض الحلال عن الله الطلاق) وفى قوانين كتير وضعتها تونس عشان تقدر تواكب التغيرات السريعة القوية اللى بتحصل ف العالم.. مش عايز أقولكم ده عامل إيه كتأثير فى تونس على وضع المرأة فى المجتمع.. قام صاحبى وأصر إنى مجنون.. وقبل ما يمشى قال جملة معاها أدركت تماماً إنه سعد زغلول كان عنده حق لما قال مفيش فايدة.. قال إيه.. مختلف معاك بشدة ومقتنع إننا لازم نرجع وخد بالك من كلمة نرجع (نتقهقر يعنى) للأصل ولكل اللى ورثناه وأكيد ده هيخلينا أحسن.. روح يا شيخ.. إلهى يعمر بيتك.. ودمتم زخراً للوطن...