موضوع كان لازم أكتبه من زمان

Web log يعني سجل الشبكة ولما ندمج الكلمتين تبقى blog واتعربت وبقت مدونة أو "بلوج" وبدأت تطلع منها كلمات جديدة منها مبلوج وهو الشخص الذي يقوم بالبلوجة!! عموماً الموضوع كبير وواسع.. نظام جديد بقاله حبة حلوين والمفروض إن أغلب المدونيين أو المبلوجين عرافين إنه عبارة عن نظام لإدارة المحتوى (طبعا ده التعريف العلمي البحت) وبالبلدي كده هو مكان تقدر تسجل فيه وتكتب على راحتك اللي أنت عايزه من غير رقيب ولا رقيب أول (للناس اللي كانوا ف الجيش).. عموماً اللي أنا عارفه ومتأكد منه إن البلوج أثر في حياتي وحياة ناس كتير! يا ترى أنا بكتب الكلام ده ليه؟؟ مش عارف.. بس المهم إنى عايز أحكيلكم!!

بدأت فى طريق البلوجة بالصدفة البحتة، فأنا عرفت البلوج عن طريق (حمكشة) اللى قال لي ده اختراع عبقري تقدر تعبر فيه عن رأيك وتنشر أفكارك وكنت مستعجل جداًاًاًاًاً إني أعمل بلوج لنفسي وخايف لحسن يكون العدد محدود ويخلص!! بس الحمد لله لحقت حتة بلوج على قدّي وفتحت بلوجين على بعض لما شعرت إنى بلوجى مش مقضينى.. وبدأت زى مانتوا شايفين أبلوج (يعني أكتب ف البلوج!!) ولقيت عدد المبلوجين بيزيد كل يوم في مصر والعالم العربي وبدأت اتحمس للفكرة أكتر.. ولقيت الموضوع مغري جداً.. حسيت إن البلوج ده رافد من روافد المعرفة.. بتعرف الشباب رأيهم إيه؟ وتتعرف على ناس اهتماماتها زي اهتماماتك.. أحلامكم واحدة.. تفكيركم تقريباً واحد.. مكان بيجمعكم سوا..

من الحاجات كمان اللي بتدي ثقل للبلوج هو إنك تقدر تعلق على أي شيء غيرك بيكتبه في بلوجك أو بلوج غيرك.. ده بيخلي في نوع من التفاعل بين الناس وبعضها.. وحاجة كمان إن المدونات دي عشان تعملها وتكتب فيها وتنشر مش محتاج إنك تجيب مبرمج ولا مصمم مواقع ولا أي حاجة ولا حتى تعرف أي آلية من آليات النشر الإلكتروني! كمان مفيش حاجة اسمها مقص الرقابة ولا مش هينفع أكتب دي ولا دي.. إضافة لكل المميزات دي.. في حاجة مهمة جداً وهي إن المدون وهو الشخص صاحب المدونة اللي بيكتب لازم عشان يكتب عن موضوع معين هيحتاج يقرا عنه الأول وده بينمي الثقافة العامة عند الشباب اللي عايز يكتب ويقول حاجة..

بس المشكلة الأساسية فى موضوع البلوجات دى هيا إن في ناس متقدرش تنام ولا تاكل ولا تشرب (مش للدرجة دي طبعاً!!) عشان عايزه تقعد تكتب وتقرا كل التدوينات بتاعت المدونين التانيين وتلاقي ناس تخش وتعلق عشان تتعرف وده مش مشكلة بس المشكلة إن شيء يأثر ف حياتنا بالقوة دي لدرجة إننا منقدرش نتحرك من غير من نعمل ده وكنت بشوف ناس تتقابل عشان تتكلم عن المدونات ومين كتب إيه؟ ومين علق عند مين؟؟ ده غير إننا لسه متعلمناش إزاى نتصرف لما يكون عندنا مساحة من الحرية زى كده.. يعنى مثلاً تلاقى مدونة عنوانها (جنسى للغاية) وحاجة من عينة (مدونة الجهاد ووجوب الاستشهاد) والعكس برضو زى (الإله غير الموجود.. لازم نعمله حدود!!).. يا جدعان متخلوش الواحد يطلع عن شعوره بقى ويسب الدين والملة.. التعبير عن الرأى له أصول.. فمثلاً تلاقى ناس مصدقت تشتم وتقبّح.. مش عاجبنى الموضوع بالشكل ده ولذلك قررت الإقلاع عن التدوين حتى إشعار آخر.. ودلوقتى بعد طول غياب عن التدوين والبلوجة.. قررت أرجع.. مش عشان حاجة ولكن لأن جوايا طاقة كتابية لازم تطلع وإلا هفرقع.. هه.. كفاية عليكم كده!!