أسئلة كتير

بعد رسالئل المجلس العسكرى الأخيرة.. فكرت أحط أسئلتى كلها فى ورقة ونفكر سوا يمكن أنا أهبل ولا مجنون؟

· ليه الجيش بيتأسف على الشهداء مع إن الضرب لسه شغال؟

· ليه أول نقطة فى رسالة الجيش يحذر فيها من الفوضى.. نفس اللى كان بيقوله مبارك؟ ليه بيحاول يزرع الخوف فى قلوب الناس اللى مش فاهمة؟ ليه؟

· ليه تانى نقطة فى الرسالة تؤكد على الخوف والرعب اللى ممكن يحصل لو حد لمس وزارة الداخلية مع الوضع فى الاعتبار إن محدش عايز يدخل وزارة الداخلية واللى هيا بعيد عن المنطقة ميل تقريباً وكمان حتى لو دخلوا وزارة الداخلية هيكون أحسن لأن الناس فى مصر أطيب منهم مفيش.. كانوا لما الداخلية رافضة تنزل ممشيين الشوارع ومحافظين على بعض وكله كان تمام مع كل محاولاتهم لزعزعة الأمن عشان الناس تندم وطبعاً تخاف.. عشان كده بسأل ليه الجيش بيقول باللفظ "تحسباً من احتمالات تعرض وزارة الداخلية لمخاطر شديدة تؤثر على حالة الأمن والاستقرار لفترة طويلة قادمة"؟!!!!! ليه؟

· ليه النقطة التالتة بتقول نطالب "المواطنين الشرفاء" معاونة الجيش في حماية المنشأت.. طب لو الجيش والداخلية مش هيعرفوا يحموا المنشآت ومنشأة بأهمية وزارة الداخلية اللى هما بيتكلموا عنها فى النقطة التانية... إزاى هيعرفوا يأمنوا الانتخابات مع الفارق إن ميدان التحرير وتحديداً وزارة الداخلية دى فى شارع واحد وإنما الانتخابات فى مصر كلها؟؟!!! وليه يحرضوا الناس على بعض؟ زى بالظبط أحداث ماسبيرو لما قالوا انزلوا احموا الجيش من الأقباط؟؟!!! ليه؟

· ليه المجلس العسكرى مش عايز ولا اسم من اللى اقترحهم شباب الثورة فى التحرير؟ البرادعى وعبد المنعم أبو الفتوح وهشام البسطاويسى؟ مع إنهم ناس محترمة وحتى لو مش محترميين.. أعمل للناس اللى هيا عايزه.. ولا هيا عافية؟؟ وليه بتطلع إشاعات بأسامى زى السيد البدوى "طبعا" مش محتاج أقول عنه حاجة.. ده غنى عن التعريف.. وبعد شوية عمرو موسى؟ ليه؟ وليه يبقى فى خبر فى الدستور يقول "جناح متشدد داخل المجلس العسكري يرفض تولي البرادعي لرئاسة حكومة الإنقاذ الوطني بدعوى شخصيته واستقلاليته وحزمه في الإدارة"؟ ليه؟

· ليه كل شوية يقولوا مندسيين وأجانب وكلام من ده؟ حيث نفس الطريقة القديمة بتاعت هتلر فى الحرب العالمية التانية لما قال لقادة الجيش خللوا الناس تحس بالخوف وبعدين شككوا فى وطنية الأعداء وبكده تضمنوا تعملوا اللى انتوا عايزينه؟ ليه بقى نظرية الخونة والمؤامرة والعميل والخمسين جنيه؟ ليه؟

· لو الشباب اللى فى التحرير خونة وعملاء بس مصريين ليه تضرب ف العين وفى مناطق قاتلة؟ ليه؟ لو بتدافع فعلاً عن الوزارة أضرب فى الرجلين؟ ليه تضرب فى العين؟ ليه؟

· ليه الناس اللى مش ف التحرير ساديين ودانهم عن الحقيقة على الرغم من إننا كلنا مصريين ودى ناس بتموت؟ عارف يعنى إيه بتموت؟ الموت يعنى خلاص؟ ليه؟

· ليه المدنيين والشباب يتحاكموا محاكمات عسكرية وحسنى مبارك اللى ساب الحكم مخلوعاً وكان القائد الأعلى للقوات المسلحة يتحاكم مدنى؟ ليه؟

· ليه مبارك "محبوس" فى المركز الطبى العالمى اللى هوا أنضف من النضافة وليه لما أيمن نور -سواء اختلفنا معاه أو اتفقنا- كان محبوس فى سجن طرة وتعب خدوه على مستشفى السجن المعفنة؟

· ليه فلول الحزب الوطنى اللى فى ناس كتير عارفين وساختهم مسموح ليهم ينزلوا الانتخابات رغم إفسادهم الحياة السياسية لسنين طويلة؟ ليه؟

· ليه لحد دلوقتى مفيش بنى آدم واحد اتحاكم فى موقعة الجمل؟ ليه؟

· ليه الاخوان مصرين مينزلوش التحرير؟ هل ضامنين المجلس العسكرى ولا ضامنين صناديق الانتخاب؟؟!! ليه؟

· ليه الإعلام لسه زى ما هوا بالظبط؟ بيقول اللى السلطة تأمره يقولوا ومش الحقيقة؟ ليه؟

· ليه المجلس عايز يكمل لحد يونيو 2012؟ تفرق معاهم ف إيه؟ زى ما حسنى كان عايز يكمل لحد سبتمبر؟ ليه؟

· ليه القوى السياسية –حتى اللى طلعوا من الميدان- ملهمش وجود دلوقتى ف التحرير ما عدا 6 أبريل –برضو سواء متفقين أو مختلفيين معاهم؟ ليه؟ وهل الكراسى متقسمة ومتوزعة يعنى ولا إيه؟ ليه؟

· ليه اجتماع المجلس العسكرى والقوى السياسية ميكنش علنى؟!! ولا فى حاجة كده ولا كده؟! ليه؟

المجلس العسكرى كله بيكذب وكذب واضح وأهدافهم الحقيقية خبيثة أووووووى.. وعلى رأى صديقى اللى قال:

ومازال الرجل يكذب ويتحرى الكذب حتى يصبح عضواً في المجلس العسكري

الحل واضح..

1- الناس تفضل فى التحرير

2- يتم تشكيل حكومة ثورية معارضة مدنية تختار من الميدان

3- يتم تجميع أفراد هذه الحكومة فى الميدان ويأدؤا اليمين قدام الشعب فى التحرير

4- تبدأ الحكومة فى تنفيذ مهامها وأولها الإعلان للعالم كله إن المجلس العسكرى شكراً وإن الحكومة دى المكونة من مجموعة كبيرة من السياسيين وليكن عددهم 10 أفراد من بينهم البرادعى وأبو الفتوح والبسطاويسى وزويل وعمرو حمزاوى وهكذا

5- المجلس طبعاً مش هيسلم.. تقوم الحكومة دى تطلب من الناس يرحلوا من التحرير لبيوتهم ويكون فى إضراب عام لمدة 3 أيام ووقتها هيكون المجلس محطوط فى خانة اليك.. ولازم يمشى فعلاً..

لو ده محصلش.. قولوا على الثورة يا رحمن يا رحيم..

ربنا يعديها على خير...